रंजका (Ranjaka)

Here is link to English version of this recipe - http://vadanikavalgheta.googlepages.com/menshinhindia.k.a.ranjaka


बेळगाव/हुबळीकडे एक 'मेणशिन हिंडी' (मेणशीन - मिरच्यांची हिंडी - चटणी) म्हणुन लाल मिरचीचा प्रकार होतो. यालाच काही भागात 'रंजका' म्हणतात. अप्पे,धिरडी, डोसे यांच्याबरोबर ही चटणी अप्रतीम लागते. ब्रेडला थोडे बटर वगैरे लावुन पण मस्त लागते. पिकलेल्या लाल मिरच्या वाळायच्या आधी ब-याच घरातुन हा प्रकार वार्षीक साठवणीचा प्रकार म्हणुन केला जातो. प्रमाण प्रत्येक घराचे थोडेफार वेगळे असते पण मुळ साहित्य तेच. एखादेवेळी गरज असेल तर लाल मिरच्या लिंबाच्या रसात भीजत ठेवुन पण ही चटणी करता येते. इथे दिलेले प्रमाण अगदी थोड्या प्रमाणात करुन पहाण्याइतकेच आहे.

Ranjaka

(चटणी करताना स्वतःच्या जबाबदारीवर करावी आणि खावी. थाई मिरच्या अतिशय तिखट असल्याने सांभाळून हाताळाव्यात.)

१०-१२ लाल ताज्या मिरच्या (मी साध्या लाल मिरच्या वापरल्या. थाई मिरच्या ४-५ पुरतील)
१ मोठे लिंबु
एका मोठ्या लिंबाएवढा गुळ
चवीपुरते मीठ

कृती - मिरच्या धुवुन कोरड्या कराव्यात. लिंबु धुवुन कोरडे करावे. साधारण अर्धा तास कोरड्या हवेला सुकु द्यावे. लिंबाचा रस एका कोरड्या वाटीत काढुन ठेवावा. मिक्सरच्या भांड्यात देठ काढलेल्या मिरच्या गुळ, मीठ एकत्र वाटावे. वाटत असताना गरजेप्रमाणे लिंबुरस वापरावा. वाटीत/बरणीत काढताना उरलेला लिंबुरस मिसळावा. हे सर्व करताना मिक्सरचे भांडे, मिसळायचा चमचा, वगैरे नीट कोरडे पुसुन घ्यावे. असे केल्याने रंजका बरेच दिवस टिकतो.

(ऐनवेळी करण्यासाठी लाल मिरच्या भाजुन घेउन करावे. पण ही चटणी टिकेल की नाही माहीती नाही.)
ही लाल चटणी सनशाईनमॉम च्या 'Food In Color: Red' साठी!

Print this post